CAGAYAN DE ORO CITY – Gibasol ni City Mayor Oscar Moreno ang resolusyon ni Gov Bambi Emano nga nakahatag kataranta sa publiko nga mabutang sa lockdown ang syudad sa Setyembre 15 ning tuiga.
Kini human giakusar ni Moreno nga nakapayagaw ang tinguha sa probinsya nga mabalik sila sa general community quarantine aron pugngan ang paspas nga local transmission sa bayrus diin gihangyo malakip sa ilang sulat ang syudad ug ubang probinsya sa rehiyon.
Miingon si Moreno nga dili makapakgang sa bayrus ang GCQ apan pagpakita kini nga nagtinapulan ang probinsya sa pag-atiman ilabina sa locally stranded individuals ug returning OFWs nga mangabot sa kalungsuran.
Samtang nataranta na si Moreno hinungdan gihatagan sa dautang kahulugan ang tinguha nila nga mabalik sa general community quarantine status ang Misamis Oriental.
Kini ang tubag ni Emano nunot sa pagbasol ni Moreno kaniya kay nahatagan sa dili maayong kahulugan ang resolusyon nga giduso ngadto sa regional IATF alang sa GCQ request.
Miingon ang gobernador nga dili angay basulon ang kapitolyo kay mismo kay naningkamot lamang kini kon unsaon nga pugngan ang local transmission sa coronavirus sa lalawigan.
