CAGAYAN DE ORO CITY – Gisaway ni Gov Bambi Emano ang pagmagahi ni Sangguniang Panlalawigan secretary Atty Ernesto Sotto Jr. nga mopaubos sa self-quarantine human mibisita sa Japan.
Miingon si Emano nga wala tahura ni Sotto ang iyang gi-issue nga memorandum nga nagmando sa tanang mga empleyado sa kapitolyo-probinsiyal nga did-an una ang dili una mobalik sa trabaho samtang wala pa mapaubos sa 14 ka adlaw nga hospital o house isolation.
Kini sa tuyo nga masiguro nga dili makayunap ang sintomas sa COVID-19 disease. Gikadismaya usab sa gobernador ang gihimong pag-kwestyon ni Sotto kon nganong ipaubos siya sa self-quarantine ingon man ang iyang kauban nga laing duha pa.
Asoy ni Emano nga nasayang lamang ang pagpaningkamot nila ni Provincial Health Officer Jerry Calingasan sa ilang kampaniya nga mabatukan ang corona virus tungod sa mga gahi’g ulo nga trabahante sa gobyerno.
Tungod niini,gitahasan ni Emano ang legal department sa paghimo’g lakang legal batok kang Sotto.
Samtang gi-depensa ni kanhi Vice Gov Joey Pelaez ang wala pagpaubos sa 14 ka adlaw kuwarantinas sa tulo ka trabahante sa Sangguniang Panlalawigan.
Kini bisan nga may mando si Gov Bambi Emano nga mopaubos sa anti-corona virus isolation ang tanang empleyado sa kapitolyo nga dunay kasaysayan nga nakabisita sa abroad.
Miingon si Pelaez nga subay sa DILG memorandum circular nga bugtong mopaubos lamang sa kuwanrantinas kadtong mga langyaw o Pinoy nga gikan sa Wuhan City,Macau ug Hong Kong sa China nga ubos sa travel ban sa Pilipinas.
Giangkon ni Pelaez nga siya ang nagdala kang Sotto ug laing duha ka consultants niini.
