CAGAYAN DE ORO CITY – Gusto ni Provincial Gov Bambi Emano nga ipaubos sa Inter-Agency Task Force sa enhanced community quarantine o ECQ ug dugangan ang alokasyon sa mga bakuna sa Misamis Oriental.
Kini human kompirmaha sa gobernador nga positibo ang duha ka close contacts sa pasyente nga natakdan sa COVID-19 delta variant sa Gingoog City ning lalawigan.
Miingon si Emano nga tuyo sa ECQ nga gilayong mapugngan ang dugang delta variant transmission sa kalungsuran sa Misamis Oriental.
Sa pikas bahin,gipaubos pa sa subsob nga monitoring ang tulo sa upat ka close contact sa tinubdan sa COVID-19 delta variant nga ubos sa pasilidad sa Dept of Health ug city hall ning syudad.
Kini samtang wala pa mogawas ang negatibo nga RT-PCR result nga sila luwas na sa delta variant nga mitakod kanila mismo sa ilang kabanay nga taga-Manolo Fortich,Bukidnon.
Miingon si City Mayor Oscar Moreno nga nag-negatibo na ang usa sa upat ka direct contact sa maong pasyente nga unang natakdan sa delta variant sa milabay’ng Hunyo ning tuiga.
Dugtong niini,mismo si Pres Rodrigo Duterte ang mi-garantiya sa katawhan ning syudad ug Gingoog City alang sa madawat nga tabang o ayuda samtang ubos sa enhanced community quarantine tungod sa delta variant sa COVID-19.
Kini bisan kon unang giangkon sa DSWD-10 nga dunay pagnihit sa ilang food suplay tungod sa duha ka syudad nga angay tabangan.
Miingon si Presidential spokesperson Harry Roque nga dili makatugot si Duterte nga mahikawan sa tabang ang katawhan samtang misunod sa ECQ guidelines.
Una nang nakahatag sa inisyal 15-mil foodpacks ang sa Gingoog City samtang dinhi sa syudad ang kamulo pa nga mag-kumpleto sa tanang dokumento nga gipangayo sa DSWD-10.
