CAGAYAN DE ORO CITY-Gibasol ni Gov Bambi Emano nga grupo ni City Mayor Oscar Moreno ang utok sa pag-ipit kang kanhi City Councilor President Elipe pinaagi sa pagkaso sa Sandiganbayan sa kurapsyon ug falsification of public documents.
Kini human unang gikonbikto sa Sandiganbayan si Elipe ingon man ang igsoon niining babaye nga si Pristine Elipe Quizon epekto sa gipasakang kaso ni kanhi city administrator Dionne Gersana batok kanila.
Miingon si Emano nga ang gihimo sa city hall ang epekto sa kasina tungod sa maayong mga programa nga anaa sa lalawigan.
Nagsumikad ang kaso sa pagbiyahe ni Quizon sa China sa tulo ka adlaw apan nalatid sa record nga daw nag-duty kini niadtong Oktubre 2013.
Samtang gikataw-an lamang sa kampo ni Moreno ang pasangil ni Gov Bambi Emano nga sila ang responsable aron madutlan sa kasong kurapsyon ug falsification of documents ang magsoong Elipe sa Sandiganbayan.
Miingon si City administrator Teddy Sabugaa nga dili nila atraso apan sa magsoong Elipe ang maong binuhatan hinungdan nga wala sila’y kalabutan niini.
Dugang ni Sabugaa nga angay na usab maghinuklog ni Elipe sa nahitabo kaniya ilabina nga dili usab tiaw ang paglisod-lisod sa konseho kaniadto sa mga programa ni Moreno alang sa katawhan sa syudad.
