CAGAYAN DE ORO CITY – Gidid-an makasulod ang mga buhi,karne ug ubang produktong baboy nga gikan sa rehiyon 11 dinhi sa Misamis Oriental.
Kini ang nalatid sa executive order no. 2 nga pirmado ni Gob Bambi Emano human kompirmado nga nakasulod na sa Mindanao ang African Swine Fever o ASF didto sa Don Marcelino Davao Occidental.
Miingon ang gobernador nga pagsiguro lamang kini nga dili maapektuhan ang kaugalingong mga baboy dinhi sa lalawigan batok sa maong sakit.
Una nang nabalaka si Emano nga mahugno ang hog industry kon mapasagdan ang pagsulod sa ASF dinhi sa rehiyon.
Samtang gipalig-on sa Northern Mindanao Hog Raisers Association ang ilang preventive measures batok sa African Swine Fever o ASF nga mipatay na sa libuang mga baboy didto sa Don Marcelino,Davao Oriental.
Miingon si Dr Benjamin Alberece,presidente sa asosasyon nga gisuportahan nila ang gipagawas nga mga kamanduan sa local govt units nga pag-ban sa mga produkto gikan sa Davao Region.
Gihangyo usab sa opisyal ang mga konsumante nga mismo ang mga karne nga gikan sa ilang asosasyon ug backyard hog raisers ang pamaliton kay sigurado kini nga miagi sa istrikto nga pag-inspeksyon.
