CAGAYAN DE ORO CITY – Modonar sa 4-mil ka toner bags si Gov Bambi Emano aron masudlan sa mga basura sa Verde Soko Philippines nga gilabay diha sa Sitio Bugwak,Brgy Sta Cruz,Tagoloan ning lalawigan.
Kini human nasuta sa inter-agency task force nga kulang ang sudlan sa mga basura aron masulod na sa 40 footer container vans.
Miingon si Sangguniang Panlalawigan Environment Committee Vice Chairman Gerardo Sabal III nga kinahanglang paspasan ang paghipos sa mga basura aron mabalik na kini sa South Korea.
Gani,gitubag usab ni Misamis Oriental 2nd District Rep Juliette Uy ang pagdugang sa mga personahe sa paghakot sa mga basura mapadali lamang ang pagpabalik niini sa Korea ning bulana.
Samtang, subling mi-apelar si Mindanao Container Terminal o MCT collector John Simon sa mga opisyal sa Misamis Oriental nga tabangan sila’g re-bagging sa nabiling 5-mil ka tonelada sa mga basura sa Verde Soko diha sa Tagoloan,Misamis Oriental.
Gibutyag ni Simon nga kulang sila’g volunteers ilabina nga anaa sa 10 ka containers ang target nila nga pun-on matag semana.
Si Simon miingon nga dili sayon ang proseso sa pagbiyahe sa basura kay gikan sa sako ibalhin kini sa container padulong sa yarda ayha ikarga sa barko.
Una nang gibutyag ni Simon nga posibleng mabalik na ang mga basura sa dili pa matapos ang bulan sa Oktubre.
