CAGAYAN DE ORO CITY-Gikalipay sa Cagayan de Oro City Police Office o COCPO ug Misamis Oriental Provincial Police Office o MOPPO ang gitunol nga “air-conditioned container van” gikan kang Gov Bambi Emano.
Kini sa tuyo nga mapakusog ang kampanyan sa syudad ug lalawigan batok sa terorismo nga dakong bahad sa seguridad.
Gihimo ni Emano ang lakang kay nalooy siya’g sud-ong sa mga pulis nga walay klaro nga plastar panahon sa kainit ug pag-ulan sa matag-checkpoint sa highway sa Barangay Tablon sa syudad.
Miingon usab si City Mobile Force Batallion commander Police Supt Isias Bacurnay nga dako’g tabang kanila ang maong van aron pagsanta batok sa mga terorista.
Samtang giila usab nga gasa ni Si Misamis Oriental PNP officer in-charge Police Supt Arden Amogod ang nadawat sa mga pulis atol sa ilang 28th Founding Anniversary.
Siya miingon nga gawas sa duha ka “air-conditioned container van” nga ilang nadawat, giabot na usab ang mga bag-ong armas nga gipalit sa PNP gikan sa Israel.
Dugtong niini, gipasalig ni Amogod nga mas pahugtan pa nila ang pagbantay sa seguridad sa tibook lalawigan batok sa mga terorista.
Nasayran nga ipahimutang usab ang laing air-condition container van sa highway sa Amoros,El Salvador City,Misamis Oriental alang sa maong katuyuan.
