CAGAYAN DE ORO CITY – Nalipay ug kontento si Gov Bambi Emano sa nahimong performance ni Pres Rodrigo Duterte sa iyang ika-lima nga State of the Nation Address o SONA.
Kini gumikan kay nahisgutan sa presidente ang walo ka haligi nga pang-gobierno nga haom sa iyang pagdumala sa lalawigan.
Gikalipay ni Emano ang pag-ila ni Duterte sa pagpaningkamot sa mga lokal nga kagamhanan aron mabatukan ang Covid-19 ingon man ang laraw niini nga subling buksan ang turismo sa tibook nasud.
Apan giangkon ni Emano nga maoy nakapakuha kaniya’g atensyon ang maayo nga plano ni Pres Duterte sa hisgutanan sa agrikultura.
Naglaum na lamang ang gobernador nga moabot ang panahon nga mahimong kaabag sa Department of Agriculture sa pagpalambo sa agrikultura sa nasud ang Department of Trade and Industry ug ang Department of Foreign Affairs aron mas mapasayon ang eksportasyon sa mga produkto sa Pilipinas padulong sa ubang kanasuran.
Samtang nahatag ang patas nga kaayuhan sa tibuok nasud.
Kini ang rason nga gihatagan ni Liga ng mga mayores-Misamis Oriental president ug Magsaysay Mayor Rey Buhisan sa grado nga 8 si Duterte.
Gibutyag ni Buhisan nga pinaagi ni Duterte nabahin na sa upat ka pilo ang kalambutan.
Dugang sa opisyal nga may nahimo si Duterte nga wala mahimo sa nanglabay nga mga administrasyon.
Sa pikas bahin,nakakuha’g atensyon kang Citizen Watch for Good Governance o CWGG convenor Atty. Antonio Soriano ang pagtawag ni Duterte kang Senate Minority Leader Franklin Drilon nga ipokrito atol sa iyang ika-lima nga SONA kagahapong adlawa.
Gibutyag ni Soriano nga walay kabag-uhan sa SONA si Duterte itandi sa miaging katuigan, apan iyang giuyunan ang pagbatikos niini kang Drilon.
Siya miingon nga angayan lamang nga tawgon sa ipokrito si Drilon gumikan sa pagka-inotil niini sa pagduso’g balaodnon may kalabutan sa anti-political dynasty law taliwala nga nagsilbi kining magbabalaod sulod sa pipila ka katuigan.
Hisayran nga nasuko si Duterte kang Drilon gumikan sa pag-depensa niini sa pamilyang Lopez, ang tag-iya sa ABS CBN network nga unang gitawag nga oligarch ni Duterte.
