CAGAYAN DE ORO CITY-Nasikop sa PDEA-10 kuyog sa kapolisan ang high value target nga brgy kapitan sa paggamit ug pagbaligya’g shabu diha sa Sitio Kala-Kala,Brgy Cogon,Balingasag,Misamis Oriental kaganihang kadlawon.
Kini human gimando ni RTC Branch 18 Executive Judge Dennis Alcantar ang pagsusi sa duha ka andana nga pinuy-anan ni Cogon Brgy Kap Obet Valmores.
Matud ni PDEA agent Isko nga nakuha gikan kang Valmores ang balor tunga sa milyon ka pesos nga gitoohang shabu,kalibre 45 nga armas ug improvised AK-47 rifle.
Nagdumili si Valmores sa paghatag komento apan nagpasalig sa pag-kooperar sa imbestigasyon sa PDEA batok kaniya.
Samtang gipanalipdan sa pipila ka brgy tanod si Valmores batok sa pasangil nga tigpayuhot kini sa shabu diha sa Balingasag,Misamis Oriental.
Giangkon sa brgy tanod nga si Roy Loquias nga tiggamitan si Valmores apan pagdaug ni Pres Rodrigo Duterte gilayon na kining miundang.
Si Loquias miingon nga mismo usab ang kapolisan ang naghangyo kaniya nga ipaundang na si Valmores sa paggamit sa droga.
