CAGAYAN DE ORO CITY – Misaka pa ngadto sa upat ka residente ang positibo sa coronvirus disease nga gikan sa Misamis Oriental.
Kini human laing locally stranded individual o LSI ang naghambin sa maong sakit nga naggikan sa lungsod sa Claveria ning lalawigan.
Miingon si Atty Jeffrey Saclot,tigpamaba sa Misamis Oriental Provincial Task Force on COVID-19 nga ang 27 anyos nga pasyente ang gikan sa probinsya sa Sugbo diin gitoohan nga didto kini natakdan sa maong balatian.
Hinoon,dili angay kabalak-an ang kahimtang sa pasyente samtang gisulod kini sa isolation facility dinhi sa probinsya.
Samtang nakagawas na ang tulo ka positibong pasyente sa coronavirus disease nga unang nasulod diha sa Northern Mindanao Medical Center nga gikan sa Libertad ug Gingoog City,Misamis Oriental.
Namahayag si Saclot nga wala sukad nagpakita sa grabeng sintomas sa bayrus ang returning OFW gikan Libertad ug ang mag-amahan nga residente sa Gingoog hinungdan nga sila gibalik na sa tagsa-tagsa ka isolation unit sa ilang mga lugar.
