CAGAYAN DE ORO CITY – Misaka pa sa siyam ang kompirmado nga nagpositibo sa Covid-19 sa tibook Misamis Oriental.Miingon si Atty Jeffrey Saclot,tigpamaba sa Misamis Oriental Provincial Task Force on COVID-19 nga maoy nakadugang ang 31-anyos nga lalaki nga taga Villanueva Misamis Oriental kinsa usa ka OFW sa Kingdom of Saudi Arabia.
Nagpositibo sa bayrus ang pasyente human gipaubos kini sa swab testing sa miaging semana.
Gibutyag ni Saclot nga hinoon asymptomatic ang pasyente ug hugot nga gimonitor sa Municipal Health Office.
Gitin-aw usab sa mga health officer nga wala kini ma-expose sa komunidad sukad miabot sa lalawigan niadtong Hunyo 11 sakay sa eroplano dihang gilayong gidala kini sa barangay isolation unit.
Samtang gimando na ni Tagoloan Mayor Gomer Sabio ang lapad nga contract tracing human nagpositibo sa COVID-19 ang ilang residente nga locally stranded individual o LSI.
Gibutyag ni Paolo del Rosario, MDRRMC head nga nabutang na sa municipal isolation unit ang maong pasyente.
Nananawagan usab si Del Rosario sa ilang mga residente nga pahibal-on sila kon may mga paryente ang LSI nga moabot aron masugat nila kini.
