CAGAYAN DE ORO CITY – Gimando ni Kinoguitan Mayor Danilo Lagbas Jr nga silotan kadtong mga mangingisda o residente nga mangdakop o manguha’g isdang butete sulod sa ilang kadagatan.
Kini ang bag-ong gabayan nga ipatuman sa mayor nunot sa kamatayon sa usa ka mangingisda ug miangol sa laing mag-amahan gumikan sa pagkahilo sa ilang gikaon nga isdang butete.
Miingon si Lagbas nga mopasar sila’g ordinansa nga hingpit nang magdili sa pagpanguha sa isda aron dili na masubli nga dunay ilang residente nga mamatay o ma-ospital gumikan lamang niini.
Hisayrang maoy namatay ang mangingisda nga si Ramboc Egcalinos kinsa nanghanggat pa ngadto sa mag-amahan nga si Jobert Vicente ug ang 4 anyos nga anak rason nga sila pulos nadala sa ospital sa miaging adlaw.
