CAGAYAN DE ORO CITY – Gisuta karon sa Criminal Investigation and Detection Group o CIDG-10 ang pasangil nga suporter sa rebeldeng New People’s Army o NPA si Tagoloan Municipal Councilor Roger Achas.
Kini human milugwa sa ilang inisyal nga impormasyon nga mihatag simpatiya si Achas sa pundok sa NPA sa lalawigan.
Gihimo ni CIDG-10 regional director Police Lt. Col. Reymund Liguden ang pahayag dihang gi-ronda nila si Achas diin nakuhaa’g duha ka .45 kalibre nga armas ug usa ka KG sub-machine gun sa ilang pinuy-anan kagahapong adlawa.
Kasuhan sa CIDG si Achas sa illegal possession of firearms and ammunitions kay walay dokumento iyang mga armas nga narekober human isilbi ang court search warrant batok kaniya.
Samtang abli usab ang mga mikropono sa Bombo Radyo sa tanang panahon aron malugwa ang tubag ni Achas sa isyu batok kaniya.
Samtang gikompirmar ni Liguden nga aduna pay mga opisyal sa gobyerno nga nalambigit sa illegal activities ang ilang gimonitor.
Nagdumili una si Liguden paghatag dugang detalye kalabot na sa maong kompirmasyon aron dili mabalda ang ilang pag-imbestigar sa maong mga opisyal.
Siya miingon nga ila nang gihimua’g dugang pakisusi ang maong public officials aron ipaubos sa operasyon sa labing dali nga panahon.
