CAGAYAN DE ORO CITY – Gipa-alerto Gov. Peter ‘Sr. Pedro’ Unabia ang kalungsuran ug mga syudad sa Misamis Oriental kabahin sa pakigbatok sa bahad sa Monkey Pox infection.
Kini human naglugwa sa mando-ehekutibo numero 14 sulod ning tuiga aron maoy subayon sa local govt units sulod sa lalawigan aron hiniusang batukan ang pagsulod sa MPox nga nagkaduol na sa Northern Mindanao.
Pagpasabot sa gobernador nga nagsumikad usab kini nga lakang sa Department of Health Memorandum no. 2024-0306 diin gitahasan ang local govt units sa pag-imposar sa bag-ong mga gabayan sa pagdumala sa MPOX infection aron dili makatkboy sa panglawas sa katawhan.
Nalatid sa sugo ni Unabia nga angayang masunod ang bag-o ug adaptive normal nga public health governance pinaagi sa paghimo sa tukma ug science-based nga paagi sa pagpakgang sa maong sakit.
Hangyo usab sa gobernador sa katawhan nga pagsunod sa minimum preventive precautions sama sa paglikay sa pakig-close contact sa mga indibidwal nga dunay kaso sa mpox, proper hand washing, paglikay sa paghawid sa mga butang ilabina sa mga pampublikong lugar lakip na ang paghikap sa mga nagsakit/patay nga mananap.
Hisayrang ulahi nga nasiplatan ang MPOX case sa Zamboanga Peninsula nga sakop sa Region 9 nga silingan ang sa Northern Mindanao provinces.
