CAGAYAN DE ORO CITY – Uyon si Misamis Oriental Task Force COVID-19 chairman ug Provincial Health Officer Dr Jerry Calingasan nga igawas ang personal nga impormasyon sa mga pasyente nga positibo sa bayrus.
Kini human mauyuni sa Inter-Agency Task Force for the Management of Emerging Infectious Disease ang maong lakang aron paspas ang contact tracing sa mga tawo nga gikauban sa pasyente.
Miingon si Calingasan mas madali ang pag-contain sa bayrus kon ipatuman kini sa Dept of Health ilabina nga walay hunong ang pasaka sa mga tawo nga natakbuyan dinhi sa nasud.
Samtang gitin-aw ni Department of Health o DOH-10 Infectious Disease Cluster head Dr. Ian Gonzales nga gihulatan pa nila ang gabayan sa mandatory public disclosure sa personal nga impormasyon sa mga confirmed positive sa COVID-19 cases.
Kini human gusto sa Inter-agency Task Force for the Management of Emerging Infectious Disease nga epektibo ang contact tracing sa mga tawo nga posibleng natakbuyan sa maong sakit.
Miingon si Gonzales nga ilang gihulatan ang detalye niini kay duha ka balaod ang angayang ibalanse sa Mandatory Reporting of Notifiable Diseases Act ug Data Privacy Act.
