CAGAYAN DE ORO CITY-Gitak-upan sa kompanyang Philippine Sinter Corporation ang ilang operasyon sulod sa usa ka semana diha sa lungsod sa Villanueva,Misamis Oriental.
Kini human nabantayan ang pagbuga’g dili ordinaryong aso ug polusyon sa maong planta nga peligro sa panglawas sa katawhan ug kinaiyahan sa maong lungsod.
Miingon si DENR’s Environmental Management Bureau regional director Sabdullah Abubakar nga dunay pagkadaot sa kahimanan sa kompanya hinungdan gimanduan nila nga dalion ang pag-ilis niini.
Ang maong kompanya ang ga-proseso sa ‘ore’ minerals aron magamit nga materyal nga paghimo’g produktong puthaw padulong didto sa Japan.
Nagdumili na’g hatag sa pahayag ang kompanya samtang giayo ang kagamitan.
