CAGAYAN DE ORO CITY – Atubangon sa freezer van driver ang kasong multiple physical injuries ug damage to property kon dili mosugot ang mga biktima sa road crash sa amicable settlement sa piskalya.
Kini human disgrasyang nabanggaan sa van ang patrol car sa Misamis Oriental Police Provincial Office diin nakasakay ang direktor niini nga si Police Col. Chuli Jun Caduyac nga pabalik na unta sa ilang headquarters sa lungsod sa Villanueva ning lalawigan.
Namahayag si Cugman Police Station traffic investitor Patrolman James Villalobos nga samaron usab sila Police Staff Sargeants Walter Ecuation;Emilio Mag-abo; Ericson Gablinez;Patrolmen Gilbert Alipar; Ryan Roy Labadan kinsa drayber sa patrol ug sibilyan nga si Habsalon Americus Ricare.
Gibutyag ni Villalobos subay sa iyang imbestigasyon,pasulod sa sentrong bahin sa syudad ang van nga gimaneho ni Dominador Estares Fernandez nga taga-Purok,Bautista, Tubod, Iligan City, Lanao del Norte gikan sa esteng bahin sa Misamis Oriental dihang dunay gilikayan nga laing sakyanan nga kalit miliko.
Saysay sa drayber nga tungod sa wala pagpaak sa preno sa van,puwersado kining napadulong sa opposite lane rason nasungag niini ang mga biktima duol sa Bigaan Bridge,Barangay Cugman ning syudad.
Hinoon,dili ra grabe ang mga biktima apan pulos sila nagbaton sa mga bun-og ug naka-confine sa Capitol University Medical Center sa Barangay Gusa ning syudad.
Samtang detinado usab sa mini-cell sa kapolisan si Fernandez ug kamulo gitambalan ang iyang helper nga si Shem Madrazo sa Northern Mindanao Medical Center nunot sa aksidente sa miaging gabii.
