Gidumdum sa amahan ni SEA Games Thailand Frisbee Gold Medalist Jeff Leonard Hortelano ang simpli nga sinugdanan sa iyang pagsulod sa natad sa sports, didto sa Initao, Misamis Oriental. Miingon si Leornardo Hortelano nga dili pa niya malimtan ang ginagmay nga mga pangandoy sa iyang anak dihang mitampo kini sa lokal nga mga tournaments, hangtud sa nakab-ot niini ang pagsilbing tipik sa representante sa Pilipinas sa dula sa Flying Disc Ultimate. Gitug-an ni Hortelano nga halos sangko sa langit ang iyang kalipay dihang gisultihan siya sa iyang anak nga nakahawid na kini’g medalyang bulawan, dihang nadag-an sa Team Philippines ang ilang pakigsangka batok Singapore sa final score 9-7. Makasaysayan ang maong kadaugan kay kini pa ang unang gold in Flying Disc Ultimate sa Pilipinas nga gidula sa Southeast Asian Games.
