CAGAYAN DE ORO CITY-Gikalipay sa pamilya sa track and field contender Edwin Mancao nga taga-Villanueva,Misamis Oriental ang kalampusan niini sa Palarong Pambansa 2018 sa Vigan City,Ilocos Sur.
Kini human nasakmit ni Mancao ang gold medal sa 5,000 meter run samtang nakig-ribal sa ubang mga atleta sa maong lugar kaganihang buntag.
Miingon ang amahan ni Edwin nga si Ernesto Mancao nga wala nila damha nga makuha kini sa iyang anak ilabina nga daghang mga bantugan nga nag-apil sa Palaro ning tuiga.
Nagtinguha ang pamilyang Mancao nga ma-avail sa college scholarship sa mga intresadong mga tunghaan aron mahatagan sa maayong edukasyon ang ilang anak.
Si Mancao kinsa grade 10 graduate sa Villanueva National High School ang anak sa farm caretaker ug market vendor nga
magtiayon diin nagbaton usab sa laing lima ka igsoon sa Brgy Lo-oc sa Villanueva ning lalawigan.
Tungod niini,nagbaton na sa 14 ka bulawan ang Northern Mindanao Regional Athletics Association gikan sa mga dula sa tennis,arnis,taekwondo ug track and field.
