(Update) CAGAYAN DE ORO CITY – Nangayo’g pasaylo si Misamis Oriental 2nd District Board Member Gerardo Sabal III kon nakahatag sa kahasol sa nagkatag niya nga election tarpulins sa pipila ka bahin sa dakbayan.
Gihimakak sa opisyal nga iyang mando ang pagpangtaod niini sa pipila ka poste sa koryente apan naggikan daw kini sa iyang mga higala ug supporters nga andam na mosuporta kaniya nga modagan sa syudad 2025 elections.
Miingon si Sabal nga wala sa iyang bukabularyo nga mosupak sa bisan unsa nga balaod nga anaa sa dakbayan rason nga nangayo kini’g pasaylo.
Kini ilabina nga wala usab siya masayod nga dunay ordinansa ang dakbayan nga nagdili diay sa mga pagpamuntang niini.
Una nang miani sa pagsaway ang walay pagpananghid ug pagtugot nga pagpamutang sa tarps ni Sabal rason nga gipangbaklas usab kini sa taga- City General Services Office sa miaging adlaw.
Si Sabal ang tipik sa gituboy ni Misamis Oriental Gov Peter Unabia nga ipadagan pagka-konsehal sa dakbayan sa sunog tuig.
