CAGAYAN DE ORO CITY – Imbestigaran sa mayoriya sa Sangguniang Panlalawigan ang dul-ag 10 ka empleyado ubos sa opisina ni Provincial Vice Gov Jigjag Pelaez sa Misamis Oriental.
Kini human nadiskobre sa SP majority nga halos dili gakakita ang maong regular ug casual employees sa mga adlaw nga ting-trabaho matag-semana.
Miingon si SP majority Board Member Gerardo Sabal III nga pangayuan usab nila’g katin-awan ang provincial human resource dept kon tinood ang gisulti ni Pelaez nga dunay memo exemption sa time-in ang maong mga empleyado.
Nabuhi ang maong isyu nunot sa declaratory relief nga giduso sa kampo ni Pelaez sa korte diin unang nagpugong sa pipila ka adlaw sa 2020 budget sa Emano administration.
Samtang pag-divert sa isyung politikal ang gihimo sa mayoriya sa Sangguniang Panlalawigan aron mabalhin ang atensyon sa katawhan sa Misamis Oriental.
Kini ang gitoohan ni Vice Gov Jigjag Pelaez kon nganong gibuhi sa mayoriya ang isyu nga pagpangita sa iyang mga office staff nga dili kanunay makit-an nga nagtrabaho sa SP.
Miingon si Pelaez nga nahisama sa kasihag sa pamunuan ni Gov Bambi Emano ang iyang pagpadagan sa sangguniang panlalawigan sukwahi sa gitoohan sa mayoriyang board members.
Gi-depensa usab niini nganong dili kanunay makit-an ang iyang office staff kay gitahasan niya kini sa field works sa probinsya.
