CAGAYAN DE ORO CITY-Nasikop sa PDEA operatives ang gika-intapang suspected illegal gambling lord ug giingong tigpayuhot sa shabu sa pipila ka lungsod sa Misamis Oriental.
Kini human gisilbi ang search warrant batok kang Reynaldo Waban,56 anyos,may kaipon ug nagpuyo sa lungsod sa Balingoan ning lalawigan sa miaging kadlawon.
Gibutyag ni PDEA-Misamis Oriental Team agent GM Gomez nakuha gikan kang Waban ang 25 gramos nga gitoohang shabu kantidad 150-mil pesos;kalibre 45 nga armas ug iyang pribadong sakyanan.
Gitumbok nga tigkuhaa’g shabu si Waban sa mga syudad sa Cebu,Surigao,Butuan ug Marawi aron ibaligya sa iyang mga parokyano sa Misamis Oriental ug dinhi sa syudad.
Samtang gikompirmar ni Waban nga nalambigit kini sa pagpadagan sa ilegal nga suwertres sa Balingoan.
Kini human unang giila si Waban nga illegal gambling coordinator samtang nagpayuhot usab sa ilegal nga droga sa maong lungsod.
Apan namugos si Waban nga ilegal nga pasugal lamang ang gisudlan niini ug giingong wala sukad naglambigit sa pagbaligya’g gidiling droga.
Si Waban ang gitumbok nga miembro sa uno dos tres drug syndicate nga naglihok dinhi sa rehiyon sa miaging mga katuigan.
