CAGAYAN DE ORO CITY – Pahamtangan sa Ombudsman sa unom ka bulan nga suspension si Talisayan Mayor Rommel Maslog epektibo ugmang adlawa.
Kini human nakit-an nga dunay basehan ang kasong serious dishonesty nga gipasaka sa grupo ni Marlon Butra ug Ferdinand Magallanes nga mga kritiko ni Maslog sa maong lungsod.
Gikompirmar sa tigpamaba ni Maslog nga si Leth Maestrado nga may kaso napasaka apan wala sila nabalaka ug gitakdang mohimo’g apelasyon sa hukom sa Ombudsman.
Nagsumikad ang kaso sa daw pagpamakak ni Maslog sa pangutana sa bangko kon wala ba siya nakasuhi sukad nahimong elected govt official diin siya mitubag nga wala.
Samtang gikompimar ni DILG-Misamis Oriental Provincial Director Engr Maris Naybe nga dunay pagmando sa ilang kadagkuan sa ipatuman nga suspension order batok kang Maslog ugmang adlawa.
Kini ang hinungdan nga gilayon siya nagpahibalo sa PNP aron makahatag seguridad sa pagsilbi sa Ombudsman order batok sa mayor.
Miingon si Naybe nga bugtong verbal order ang nadawat niya kang DILG 10 regional director Arnel Agabe kabahin sa pag-suspenso kang Maslog.
