CAGAYAN DE ORO CITY-Nag-suspenso sa ilang mga klase ang dul-ag 10 ka lungsod nga apektado sa mga pag-ulan sa Misamis Oriental kagahapong adlawa.
Miingon si Provincial Disaster Risks and Reduction Management Office head Fernando Dy Jr nga gumikan kini sa kakusog sa pag-ulan diin nagdala’g bahad sa mga pagbaha ug pagdahili sa yuta.
Giklaro ni Dy nga ang class suspension ang inisyatiba sa local govt unit officials ingon man sa school principals ug wala magikan sa provincial govt.
Kabahin sa apektado ang lungsod sa Balingasag, Sugbongcogon, Binuangan, Lugait, Gitagum, Libertad, Jasaan, Opol, Salay ug Lagonglong ning lalawigan.
Samtang nakatuktok ang City Disaster Risk Reduction and Management Dept o CDRRMD sa epekto sa presensiya sa bagyong Doming nga ania sa Mindanao.
Kini bisan nga walay pagtubo sa tubig sa tributaries sa syudad ug silingan mga probinsya sama sa Bukidnon.
Miingon si CDRRMD head Allan Porcadilla nga partikular nga gitutukan nila ang kabarangayan sa Balulang padulong sa Bonbon ug Macasandig ngadto sa Macabalan sa syudad.
Kini tungod ang maong mga brgy ang direktang maigo sa pagpaha kon kusog ang ulan gikan kabukiran nga mosubay sa suba sa syudad.
