CAGAYAN DE ORO CITY – Kasupakan sa gabayan sa pakigbatok sa coronavirus disease o COVID-19 nga ipakuha’g travel pass ang mga residente sa syudad aron makasulod sa bisan asa sa Misamis Oriental.
Kini ang rason nga giaghat ni City administrator Teddy Sabuga-a ang katawhan nga dili na mokuha’g sa travel pass aron lamang makasulod sa lalawigan.
Namugos si Sabuga-a nga wala kini malatid sa Authorized Persons Outside Resident o APOR protocol.
Una niini,gikuwestiyon ni City Mayor Oscar Moreno ang basehan sa lalawigan kabahin sa travel pass ilabina nga wala kini nalatid sa gabayan sa national inter-agency task force.
Dili suliran kon magdumili ang city health office o CHO nga mohatag sa travel pass alang sa mga residente sa syudad aron lamang makasulod sa Misamis Oriental.
Miingon si Misamis Oriental Provincial COVID-19 Task Force spokesperson Atty Jeffrey Saclot nga mismo si Gov Bambi Emano ang nagmando kang Provincial Health Officer Dr Jerry Calingasan nga mo-isyu sa maong passes sa mga residente nga nagkinahanglan niini.
Apan giklaro ni Saclot nga mahatag lamang ang travel pass nga magamit sa mga pagbiyahe sa lalawigan kon lehitimo ug may sertipikasyon sa brgy kon walay sintomas sa coroanvirus o person under monitoring ang tawo nga mokuha niini.
Dugtong niini,dili gusto ni Emano nga dudahan sa katawhan kon giunsa paggamit ang salapi ug ubang donasyon nga alang sa health ug security frontliners nga gisalig sa donors diha sa Misamis Oriental.
Kini ang hinungdan nga gilusad nila ang transparency donation board diin makita ang lista sa mga tawo o kompanya nga naghatag sa donasyon alang sa frontliners nga nakigbatok sa coronavirus.
Miingon si Emano nga tuyo niini nga masayod ang publiko sa gipadulngan sa mga ayuda nga gidonar sa mga kompanya o grupo aron pagtabang sa govt workers nga nagbantay nga dili masudlan sa positibong kaso sa bayrus ang lalawigan.
