CAGAYAN DE ORO CITY – Gipamugos sa kampo ni Misamis Oriental Vice Gov Jigjag Pelaez nga proteksyon alang sa katawhan batok sa giingong pagpangabuso ang tuyo nila kon nganong midangop sila sa korte.
Kini human miduso sial sa kasong declaratory relief aron pugngan ang padayong pagpatuman sa 3.5 bilyon pesos nga budget ning tuiga sa lalawigan.
Kini ang tubag ni Pelaez batok sa pasangil ni Misamis Oreintal Gov Bambi Emano nga pagpihig sa batakang serbisyo sa lalawigan ang gihimo sa oposisyon sa pagpangayo nila’g temporary restraining order o TRO sa korte.
Samtang dili angay mabalaka ang katawhan kay may magamit pa nga salapi ang Emano administration aron ipadayon ang paghatag sa batakang serbisyo sa lalawigan.
Kini ang gibutyag ni Pelaez nunot sa pagpaundang sa korte nga gamiton ang 3.5 bilyon pesos nga pondo ning tuiga sa lalawigan.
Miingon si Pelaez nga mahimo nga gamiton sa administrasyong Emano ang 2019 budget kay alang kanila dakong ilegal ang napasar nga pondo ning tuiga hinungdan gidangop nila sa korte.
Samtang gilayong gisupalpal sa kampo ni Emano ang gipatoo sa grupo sa oposisyon sa Sangguniang Panlalawigan nga mahimong gamiton ang 2019 budget aron dili mabalda ang pagserbisyo sa katawhan sa probinsya.
Miingon ang legal counsel sa probinsya nga si Atty Neil Pacana nga dili nga sirado na ang libro sa 2019 budget kay kasamtangang gigamit na ang 2020 budget nga kantidad sa 3.5 bilyon pesos.
Namugos si Pacana nga wala nagpataka lamang sa paghubad sa balaod ang oposisyon hinungdan naapektuhan ang serbisyo sa katawhan sa lalawigan.
