CAGAYAN DE ORO CITY – Gisaway ni Misamis Oriental Vice Gov Joey Pelaez ang naghinobra nga pagpamulitika sa milangkob sa mayoriya sa Sangguniang Panlalawigan o SP.
Kini human nagtoo si Pelaez nga pag-ipit kaniya ang gihimo sa mayoriya sa SP diin gihukasan siya sa pagka-chairman sa duha ka dagkong komitiba sa lalawigan.
Miingon si Pelaez nga klaro nga pagbinastos ang gihimo kaniya sa mayoriya rason nga giyam-iran usab sa minoriya ang mga gitanyag nga komitiba nga nahatag kanila.
Partikular nga gitumbok niini ang pagpa-papel ni SP board member President Elipe diin nagbaton sa duha ka chairmanships sa mga komitiba sa Sangguniang Panlalawigan.
Samtang gihagit ni SP board member President Elipe si Vice Gov Joey Pelaez nga dili mag-minaut diha sa paghupot sa mga komitiba sa lalawigan.
Kini ang tubag ni Elipe nunot sa paghukas kanila ni Pelaez sa pipila ka komitiba nga gihawiran niini sa taas nga panahon.
Miingon si Elipe nga dili pagpanginsulto apan gitul-id lamang sa mayoriya sa Sangguniang Panlalawigan ang daw dili ensakto nga pagpadagan ni Pelaez.
Si Elipe ang gitakdang makigbangga pagka-bise gobernador batok sa igsoon ni Pelaez nga si board member Jigjag Pelaez sunod tuig.
