CAGAYAN DE ORO CITY-Dili mogahi’g pondo ang kagamhanang probinsyal aron ipaubos sa drug rehabilitation ang mga empleyado nga masapon paggamit sa gidiling droga sa kapitol probinsyal.
Kini human milugwa sa bag-ong gabayan ang civil service commission nga dili angay tangtangon ang regular employees bisan kon masapon mogamit sa gidiling droga apan ipaubos una sa rehabilitasyon.
Gihimo ni Gov Bambi Emano ang pahayag nunot sa pag-positibo sa usa ka empleyado sa Provincial Health Office sa paggamit sa shabu dihang sorpresa gipaubos sa drug test.
Miingon si Emano nga anaa sa upat ka empleyado sa kapitolyo ang nasapon paggamit sa illegal drugs diin pipila kanila ang nangatangtang na sa trabaho sulod ning tuiga.
