CAGAYAN DE ORO CITY – Gitawag sa Cagay-anong historian sa syudad nga dili makatarunganon ang gihimo sa kapitolyo-probinsiyal sa Misamis Oriental nga gikanta sa binisaya nga bersyon ang Lupang Hinirang sa flag-raising ceremony.
Sa pakighinabi sa Bombo Radyo, gipamugos ni CdeO historian Nanette Roa nga pinaagi sa pinulungan nga “Filipino o Tagalog”, lamang ang mahiusa sa ang mga Pinoy sulod sa kapin gatos ka lenggwahe.
Dugang niini nga ang pag-awit sa Lupang Hinirang susama sa pag-ila sa nag-inusarang bandila sa Pilipinas.
Samtang nakasupak sa balaod ang gihimo sa kapitolyo-probinsiyal sa Misamis Oriental diin gikanta sa binisaya nga bersyon ang Lupang Hinirang.
Sumala ni former Integrated Bar of the Philippines Misamis Oriental -Cagayan de Oro chapter Pres Atty Eddie Cuaresma nga nalatid sa Republic Act 8491 o the Flag and Heraldic Code of the Philippines nga kinahanglang magpabilin ang original Filipino lyrics ug kantahon kini pinaagi sa “march tempo.”
Dugtong niini, gisugyot ni Cuaresma nga kinahanglang amendahan ang maong balaod aron mahataga’g katumanan ang kagustuhan sa lalawigan nga kantahon sa binisaya nga version ang Lupang Hinirang.
Samtang gikalipay ni Gob Bambi Emano nga dunay mikaso batok kanila sa National Historical Commission of the Philippines tungod sa pagkantang binisaya sa Lupang Hinirang ngadtgo sa Yutang Pinangga.
Kini human unang gi-kuwestiyon sa usa ka grupo ang paghimo niini sa kapitolyo sulod na sa kapin unom ka tuig.
Miingon si Misamis Oriental Provincial Government spokesperson Carlo Duga-duga nga higayon kini sa lalawigan aron makakuha’g katin-awan kon may nasupak sila nga balaod sa paghimo niini.
Namugos si Duga-Dugan nga bisan ang Cebu,Iloilo ug ubang mga probinsya sa nasud ang may kaugalingong hubad usab sa Lupang Hinirang national anthem.
