CAGAYAN DE ORO CITY – Misaka pa sa lima ka residente ang nagpositibo sa coronavirus disease sa Covid-19 sa tibook lalawigan sa Misamis Oriental.
Miingon si Misamis Oriental Provincial Task Force on COVID-19 spokesperson Atty Jeffrey Saclot nga pinakaulahing nagpositibo sa bayrus ang 22-anyos nga taga Gingoog City gikan sa Cebu City.
Apan gitin-aw ni Saclot nga walay angayang kabalak-an kay gidala gilayon sa isolation facility ang pasyente.
Gihimo na ang lapad nga contract tracing sa task force sa mga pasahero nga nakahimamat sa pasyente nga usa ka dumptruck drayber.
Una nang nakatala ang lalawigan sa OFW nga taga-Libertad,mag-amahan gikan sa Gingoog City ug nagsumikad sa Claveria nga pulos LSI nga positibo sa bayrus sa miaging semana.
Samtang gikalipay ni Saclot ang kamanduan nga gipaggawas sa Department of Interior and Local Government nga temporaryong nag-ban sa locally stranded individuals sa Cebu City nga mopauli balik sa ilang probinsya ingon man ang pagbisita niini.
Kini gumikan kay sagad sa mga LSI nga naggikan sa Cebu City ang nagpositibo sa makamatay’ng sakit.
Gibutyag ni Saclot nga pinaagi sa kamanduan, dako ang posibilidad nga maminusan ang kaso sa COVID-19 sa lalawigan.
Dugtong niini,giangkon ni Dept of Health -10 regional director Dr Adrinao Suba-an nga dakong hagit kanila ang pagpanguli sa returning OFWs ug locally stranded individuals gikan sa kauluhan pabalik sa rehiyon.
Kini human paspas ang pagsaka sa mga positibo sa coronavirus disease diin mitala na sa 71 ka tawo ang nangatakdan niini.
Miingon si Suba-an nga nabalaka sila nga paspas mapuno ang isolation facilities nga giandam sa matag-local govt units alang sa OFWs ug LSIs kon walay himoon nga intervention niini ang IATF sa kauluhan.
