CAGAYAN DE ORO CITY-Gilusob sa bana-bana 130 ka rebeldeng NPA nga ubos sa Guerilla Front Committee 4-B ang Equiparco Construction Company nga may proyektong gi-trabaho sa Brgy Eureka,Gingoog City,Misamis Oriental kagahapon sa hapon.
Kini human nakapangayo’g tabang ang on site project engineer nga si Tim Joseph Pepe sa kapolisan tungod sa gihimo sa mga rebelde.
Namahayag si Gingoog City Police Station commander Supt Ruel Lami-ing nga gidala sa pagsibat sa mga rebelde ang tulo ka truck isip get-away vehicles.
Mihimo usab sa pag-lecture ang mga rebelde sa mga residente sa Sitio Talangisog diin gimanduan sila nga dili motoo sa ipanulti sa mga opisyal sa maong syudad.
Una nang gipangkuha sa mga rebelde ang personal belongings sa mga empleyado sa maong kompanya dihang naharang nila kini sa gimontar nga road blockade apan paglabay sa pipila ka oras giuli ‘ra balik ayha nanibat sa wala na matino nga direksyon.
Kasuhan sa kapolisan ang mga rebeldeng NPA sa pagpangulo sa usa ka nagpailang Kumander Dahon nga responsable paglusob sa construction
company sa Brgy Eureka,Gingoog City.
Kini bisan nga wala dagmali sa mga rebelde ang mga trabahante sa Equiparco Construction Company nga nag-trabaho sa usa ka proyekto sa maong syudad.
Namahayag si Gingoog City Police Station commander Supt Ruel Lami-ing nga gihulat nila ang pagbalik sa mga trabahante nga gi-hold sa mga rebelde aron pormal nga mahan-ay ang kaso nga ipasaka sa piskalya tungod sa hitabo.
Hisayrang kabahin sa na-hostage sa mga rebelde ang mga empleyado sila si Ricky Calma, Sundallo Gonzales, Leah Mae Libreha ug Lloyd Simbajon.
