CAGAYAN DE ORO CITY – Pasado na sa ikatulo ug pinal nga pagbasa ang balaodnon ni Misamis Oriental 2nd District Rep. Bambi Emano nga nagtumong nga opisyal na nga kalihukan ang Kuyamis Festival sa kada-sumad o katukuran sa lalawigan.
Kini human unang giduso sa kongresista ang maong balaodnon sa miaging tuig nila nga sesyon aron dunay klaro nga ilhanan ang lalawigan pag-abot sa mga kasaulugan sama sa ubang mga lugar.
Sa gihimong botasyon,nakuha niini ang tanang boto sa 263 ka kongresista samtang walay nagsupak ug nag-abstention atol sa ilang pagbalik sesyon kagahapong adlawa.
Kini nga kasaulugan ang siyam ka tuig usab nga gipanguluhan ni Emano sa panahon nga kini gobernador pa sa lalawigan ug gipadayon gihapon ni incumbent Governor Peter ‘Sr. Pedro ‘Unabia.
Ang ‘Kuyamis’ ang klase sa lubi nga nagbaton sa talagsaong katam-is hinungdang naumol ang pangalang ‘Misamis’ sa unang bahin sa kasaysayan sa nasud.
