CAGAYAN DE ORO CITY – Gikuwestiyon ni City Mayor Oscar Moreno ang kamanduan ni Provincial Gov Bambi Emano nga nag-obligar sa mga residente nga mokuha’g no home quarantine pass/travel pass no travel policy kon mosulod sa Misamis Oriental.
Kini human miani’g kalibog ug kalisod alang sa mga residente ang pagkuha niini diin health certificate lamang ang mahimo mahatag sa city health office.
Miingon si Moreno nga angay masuta kini sa regional inter-agency task force nga gabayan aron dili maglisod sa pagpatuman niini ang health frontliners diha sa kalungsuran ug mga syudad sa lalawigan.
Una niini,gibutyag ni Atty Jeffrey Saclot,tigpamaba sa MisOr Task Force COVID-19 nga tuyo niini nga mapakusog ang general community quarantine aron dili masudlan sa positibong kaso sa bayrus ang katawhan sa lalawigan.
Samtang gitin-aw sa City Health Office o CHO nga walay opisyal nga koordinasyon ang provincial government sa bag-ong executive order nga gipaggawas ni Emano.
Gumikan niini, nagdasok ang katawhan sa syudad sa pagbisita sa ilang buhatan aron mangayo’g home quarantine pass ug travel pass.
Gibutyag ni city health cluster head Dr. Maria Magdalena Juan nga nag-issue sila’g medical certification sa mga tawo nga mahimong makabyahe.
Gitin-aw usab niini nga wala mangayo’g bayad ang CHO sa kantidad nga P225 fee apan P50 lamang ang ilang gipangayo alang sa medical certification.
Una nang gibutyag ni Juan nga dakong hagit kanila ang pag-isyu sa home quarantine pass ug travel pass.
