CAGAYAN DE ORO CITY – Naka-lockdown sa pipila ka adlaw hinungdang wala una’y pagtunol sa batakang serbisyo ang munisipyo sa lungsod sa Jasaan,Misamis Oriental.
Kini epekto sa pagpositibo ni Jasaan Mayor Redentor Jardin ug ubang mga empleyado sa COVID-19 sugod pa sa miaging semana.
Gibutyag ni Upper Jasaan Brgy Kap Allan Leuterio nga tuyo niini nga pag-disinfect una sa tibuok munisipyo ayha ibukas pagbalik sa katawhan sa maong lungsod.
Miingon ang opisyal nga gani duha sa mga empleyado sa bayrus nga gipaubos sa isolation ang mismo gikan sa iyang brgy.
Sa pikas bahin,naka-isolate usab ang upat ka personahe nga sakop sa Municipal Disaster Risk Reduction Management Office tungod sa pagka-takdi sa COVID-19 sa Baungon,Bukidnon.
Gibutyag ni Baungon MDRRMO head George Magaña nga gilayong dunay gihulip una kanila aron dili mabalda ang paghatag serbisyo sa ilang katawhan samtang nagpaubos sa medikal nga pag-atiman sa maong lungsod.
Hinoon,kabahin na siya sa 12 ka personahe nga unang natakdan sa bayrus nga nag-negatibo na ning panahona.
