CAGAYAN DE ORO CITY – Posibleng gi-atake sa balatian ang brgy konsehal nga nakit-ang patay sulod sa comfort room o pansayan sa Conchita Hotel sa Yacapin-Cogon ning syudad.
Giila ni Master Sgt Norbert Ian Zafra,imbestigador sa Cogon Police Station ang biktima nga si Vicente Padreganda,48 anyos nga taga-Brgy Salubsob,Kinoguitan,Misamis Oriental.
Miingon si Zafra nga subay sa inisyal nila nga pakisusi,mibati’g sakit sa tiyan ang biktima sa miaging gabii ug nakit-an na lang sa iyang mga kaubang konsehal nga wala na’y kinabuhi sulod sa pansayan.
Mitambong sa usa ka orientation seminar ang biktima nga gipasiugdahan sa DILG dinhi sa syudad.
Si Padreganda ang ka-check-in sa room 304 sa ikatulong andana sa maong hotel.
Samtang gikakurat ug gikasubo sa katawhan sa lungsod sa Kinoguitan ang gidangatan sa usa sa ilang brgy kagawad nga kalit-namatay samtang mitambong sa DILG orientation seminar sulod sa usa ka hotel ning syudad.
Miingon si Kinoguitan Mayor Danilo Lagbas Jr nga nalipay pa si Padreganda nga nakig-kontakay kanila sa lungsod kagahapong adlawa.
Hisayrang si Padreganda ang gipatambong gikan sa maong brgy sa kalihuan kay nagsaki-sakit usab ang mismong punong brgy sa ilang dapit.
