CAGAYAN DE ORO CITY-Gipanalipdan lamang ni Pres Rodrigo Duterte ang seguridad sa katawhan hinungdan nga gipangayo niini sa kongreso ang lugway sa martial law sa Mindanao.
Gibutyag sa Bombo Radyo ni Chief Presidential Legal Counsel Atty Salvador Panelo nga obligasyon ni Pres Duterte ang paghatag proteksyon sa publiko batok terorismo hinungdan nga dili angay hatagan sa dautang kahulugan ang martial law extension hangtod Disyembre 31 ning tuiga.
Kini ang rason nga gipangayo niya ang suporta sa kongreso aron hingpit masumpo ang mga grupo nga bahad sa seguridad sa Mindanao.
Samtang giuyunan ni Magdalo partylist Rep Gary Alejano ug Atty Antonio Soriano sa grupong Citizens Watch for Good Governance o CWGG ang laraw ni Pres Rodrigo Duterte nga lugway sa martial law sa Mindanao.
Kini sa kondisyon nga maka-pukos na lamang ang deklarasyon sa Lanao del Sur ug dili na sakupon ang tibuok Mindanao.
Gibutyag ni Alejano dili siya supak sa 60 ka adlaw nga lugway apan unta may igo nga basehan.Samtang,gibutyag ni Soriano nga walay kuwestiyon ang suporta sa katawhan sa mga paningkamot ni Duterte.
Apan namahayag si Soriano nga dili na kinahanglan nga ilukop ang Mindanao sa martial law kay naka-pokus lamang ang atake sa mga terorista sa Marawi City,Lanao del Sur.
Sa pikas bahin,mapadali ang pagsikop sa target wanted criminals kon pabiling ubos sa martial law ang Mindanao.
Pahayag kini ni C/Insp Mardy Hortillosa,tigpamaba sa Cagayan de Oro City Police Office o COCPO sa init nga hisgutanan sa martial law extension nga gipangayo ni Pres Rodrigo Duterte sa kongreso.
Gibutyag ni Hortillosa nga walay nahimo nga tulubagon ang kapolisan sa publiko sa unang han-ay sa martial law tungod kay nag-amping sila kuyog ang militar nga dili makasupak sa tawhanong katungod sa mga sibilyan.
Gani,bintaha kini nga mando ni Pres Duterte kay paspas nila nasikop ang suspected Maute-ISIS members ug bombers nga nakasulod dinhi sa syudad sa miaging mga bulan.
