CAGAYAN DE ORO CITY – Napatay sa kapolisan ug militar ang usa sa giingong sakop sa Moro National Liberation Front o MNLF sa lungsod sa Kapatagan,Lanao del Sur.
Kini human gisilbi sa joint PNP-AFP operation ang warrant of arrest sa kasong murder batok kang MNLF member Meranda Bagnas dihang nahitabo ang 20 minutos nga engkuwentro.
Miingon si Lanao del Sur PNP Provincial Director Col Madzghani Mukaraam nga gisugat sa mga bala sa M203 ang grupo ni Police Capt Karl Vincent Centinaje samtang isilbi unta ang warrant batok Bagnas.
Nakasukol ang kapolisan ug militar hinungdan napatay si MNLF member Rakim Antonio kinsa kabahin sa mipaulan kanila sa mga bala.
Gawas kang Centinaje,samaron usab sila si Cpl. Morsed Maliga ug Patrolman Abdul Khamied Unda apan pulos na luwas ang mga kahimtang.
Giklaro ni Mukaraam nga wala nila masikop si Bagnas kay kabahin kini sa naka-eskapo sa operasyon.
