CAGAYAN DE ORO CITY-Gitambagan karon sa Moro National Liberation Front o MNLF ang Moro Islamic Liberation Front o MILF nga dili magpadala sa gisabwag nga intriga aron ipasabong sila sa hisgutanan sa kahusay’g kalinaw sa Mindanao.
Kini human unang mihukom si MNLF founder Nur Misuari nga mokuyog sa pederalismong gobyerno nga gikampanya ni Pres Rodrigo Duterte.
Miingon si MNLF spokesperson Atty Emmanuel Fontanilla nga walay dagkong isyu nga angay awayan kauban ang MILF nga midumala sa Bangsamoro Transition Authority o BTA hangtod sa tuig 2020.
Nasayran nga dili tanang grupo sa MNLF ang supak sa Bangsamoro Organic Law o BOL nga gihingusgan gihapon ni Duterte alang sa Mindanao.
