CAGAYAN DE ORO CITY – Nabag-uhan si Misamis Oriental 2nd District Cong. Bambi Emano sa mga panan-awon ug mismong resulta sa piliay sa milabay’ng Mayo 12 ning tuiga.
Kini ang pagtug-an sa kongresista atubangan sa mga kaalyado nga nandaug ug wala bulugi sa kahigayunan sa ilang gilusad nga Padayon Paglaum mass oathtaking ceremony sa Xavier Estates & Country Club Grand Convention Hall,Upper Balulang ning syudad kaganihang buntag.
Namahayag si Emano nga nahiagom sa lumalabay nga kakulangon ang partido diin napukan ang iyang mga katimbang nga sila Provincial Gov. Peter Unabia ug 1st District Cong. Christian Unabia ngadto sa mga kaatbang nila sa milabay’ng piliay.
Apan siya miingon nga mobangon nga lig-on ang bando sa Padayon Paglaum ug ipalahutay ang mga nasugdan nga mga programa ingon mga batakang serbisyo sa lalawigan.
Miprangka usab kini sa mga kaalyado nga dili sila pugngan kung makahukom nga mobiya sa partido.
Kini tungod kay ikapaniguro gihapon niini nga kay padayon sila nga alagaran kutob sa iyang mahimo kung unsa man ang makuha niini nga mga pondo gikan sa kongreso.
Hisayrang si Emano kanhi gobernador sa probinsya ug si Unabia ang naghulip kaniya diin naporma ang ilang solido nga alyansa.
