CAGAYAN DE ORO CITY – Mohimo sa mobile patrolling ang mga pulis nga natahasan mohatag seguridad sa business establishments ingon man kabalayan sa mga sentrong bahin sa Northern Mindanao.
Kini agi’g pagpugong batok sa pipila ka tawo nga mosakay sa panahon ug mohimo’g kreminalidad sama sa pagpanglungkab kay wala ang mga tagtungod sa mga balay-patigayon ingon man mga tagbalay kay namalandong alayon sa semana santa nga obserbasyon.
Miingon si Police Regional Office 10 spokesperson Major Joann Navarro nga bisan dako sa ilang puwersa ang anaa sa vital installations ingon man pilgrimage site areas apan may gigahin gihapon sila sa pag-alkontra sa mga sakay sa panahon nga mga personalidad.
Gibutyag ni Navarro nga dili angayang maghinobra ang kahinam sa mga tagbalay sa ilang pila ka adlaw nga pagdalikyat sa mga lugar diin sila mamalandong apan seguruhon una nila nga aduna pa sila’y mabalikan.
Gipasabot sa opisyal nga dili angayang mohatag tsansa ang mga negosyante o mga tagbalay nga makahigayon pagpangbiktima ang mga dautang tawo nga misakay lang sa Kristohanong aktibidad.
Gihimo ni Navarro ang pasidaan kay dili gusto sa PNP nga adunay mga tawong mabiktima tungod lang sa kakulangon sa paghatag seguridad sa ilang mga hinaguan ug napondar nga mga kabtangan.
Hisayrang mil-577 ka hiniusang puwersa sa estado ang gipakatag sa tibuok rehiyon aron pagsiguro nga walay pagkatugaw sa tinuig nga obserbasyon sa semana santa.
