Gihatagan og bili ni Konsehal Roger Abaday ang paghatag og katungod ni Mayor Klarex Uy sa pagnegotiate sa bangko alang sa 8.5 billion pesos nga loan aron matukod ang bag-ong Government Complex sa 22.9-hectare compound sa Upper Carmen.
Gipasabot sa opisyal nga makatabang ang gipahimutang nga relocation sa paghimo og one-stop shop alang sa tanang pampublikong buhatan ug sa paghaw-as sa kahuot sa trapiko sa dakbayan.
Apan gitin-aw sa konsehal nga dili basta-basta makapirma ang ehekutibo tungod sa Section 324 sa Local Government Code diin adunay 20-percent debt servicing limit ug gikinahanglan pa ang NDSC Certificate gikan sa BLGF ug Monetary Board Opinion gikan sa Bangko Sentral ng Pilipinas.
Tungod sa gipahimutang nga plano, gireserba usab ang kasaysayan sa 85-anyos nga kasamtangang City Hall aron himoong Cultural Heritage Hub ug pormal nga City Museum.
