CAGAYAN DE ORO CITY – Gi-alarma ni kanhi Misamis Oriental Vice Gov. Joey Pelaez ang publiko kabahin sa iyang nakuhang impormasyon nga ipaubos sa Public Private Partnership ang pinakadako ug sobra gatos anyos na nga Misamis Oriental Comprehensive General High School o MOGCHS sa Don Apolinar Velez Street ning syudad.
Miingon si Pelaez nga adunay usa sa mga miembro sa Sangguniang Panlalawigan ang mibisita kaniya ug nagbulgar sa plano sa kapitolyo-probinsyal sa maong tunghaan.
Siya miingon nga kung nahimo sa provincial govt ang joint venture sa pipila sa kabtangan sa capitol grounds ug Public Private Partnership sa walo ka ospital sa lalawigan,dili imposible nga buhaton usab kini sa MOGCHS.
Hisayrang ang maong tunghaan nagsugod sa pag-alagad tuig 1909 diin ang sobra 7 ektaryas nga yuta niini ang gi-donar sa bayaning Cagay-anon nga si Don Apolinar Velez nga nahimo usab nga dakong opisyal ning syudad sa unang mga panahon.
