CAGAYAN DE ORO CITY – Bag-o na apan susamang tahas nga pagmintar sa kahusay’g kalinaw ug mga programa ang ipatuman ni Police Col. Rommel Magleo sa Misamis Occidental Provincial Police Office o MOCPPO.
Kini human gihulipan si MOCPPO Director Col Dwight Monato ni Magleo alang sa laing tahas nga isangon kaniya sa Camp Alagar.
Namahayag si Police Regional Office 10 Director Brig Gen Ricardo Layug Jr naglaum ang tropa nga mapadayon ni Magleo ang mga programa nga nabiyaan ni Monato sa Misamis Occidental.
Siya miingon nga dili angay limtan sa police officials ang nakasangon kanila nga tahas nga mao ang paghatag proteksyon sa katawhan.
Gipasalamatan usab sa PRO 10 command group ang serbisyo ug dedikasyon sa trabaho ni Monato.
Gihimo ang simple nga seremonya sa mismong Camp Alagar diin gipanguluhan ni Layug ug gisaksihan sa ubang senior officers sa PRO 10 sa Camp Alagar ning semanaha.
