CAGAYAN DE ORO CITY – Gikonsidera sa city government nga generally peaceful ang monthly long fiesta celebration sa kapistahan ni Sr San Agustin ning syudad.
Kini subay sa asssesment sa city hall pinaagi sa giluwatang pahayag sa tigpamaba ni City Mayor Klarex Uy nga si Janboy Actub sa interbyu sa Bombo Radyo.
Miingon si Actub nga saksi mismo ang mga residente ug mga bisita kon giunsa pagpatuman sa mga otoridad ang kahugot-seguridad mahatagan lang sa proteksyon ang tanang aktibidad sa simbahan ug kagamhanan.
Anaa sa 54 ka kalihukan ang gipatuman sa dakbayan sa kapistahan ning tuiga.
Samtang wala matago sa incident management team ang mga hagit alayon sa pagpahigayon sa daghang mga kalihukan sa dakbayan haom sa kapistahan sa patron Senior San Agustin.
Miingon si CDRRMD manager Nick Jabagat nga dili tiaw ang kadako sa gikinahanglang seguridad partikular sa mga outdoor activity nga gidagsa sa daghang katawhan sa miaging mga adlaw.
Gani,wala pa nila giwagtang ang aktibo nga pagtutok sa IMT samtang dili pa hingpit matapos ang bulan sa Agosto.
Hinoon,naibtan sila’g tunok kay walay bisan usa ka hitabo nga nakatugaw sa seguridad sa dakbayan.
Dugtong niini,naka-full alert status pa gihapon ang Cagayan de Oro City Police Office bisan kon dul-an tibawas na ang mga kalihukan sa kapistahan sa dakbayan.
Pagpasabot ni COCPO spokesperson Lt Col Evan Vinas nga tuyo niini nga dili mohatag kumpiyansa ang katawhan ug walay higayon ang posibleng mga pundok nga makasabotahe sa kahusay’g kalinaw sa dakbayan.
Siya miingon nga may nabilin pang pipila ka kalihukan nga inisyatiba sa dakbayan nga angay pang hatagan sa hugot nga seguridad.
Una niini,gi-assess sa COCPO nga sobra ka malinawon ang kapistahan sa dakbayan.
