Padayon nga gimonitor sa Misamis Oriental Police Provincial Office (MOPPO) ang mga lihok sa mga tawong nalambigit sa illegal nga droga sa probinsya, human sa ubay-ubay nga mga nadakpan sa milabayng mga semana. Sumala ni MOPPO Spokesperson Police Captain Geraldine Botanas, aminado ang ilang buhatan nga sa unang bulan pa lang sa tuig daghan na silag namatikdan nga mibalik sa paggamit sa illegal nga droga.Matod pa ni Botanas, sa mga miaging semana sa bulan sa Enero, daghan na usab ang nadakpan sa mga buy-bust operations nga gipahigayon sa kapulisan sa lain-laing lugar sa probinsya sa Misamis Oriental.Sa laing bahin, base sa assessment sa kapulisan, nagpabiling generally peaceful ang probinsya sa Misamis Oriental sa bulan sa Enero, samtang padayon gihapon ang pagbantay sa kahapsay ug kalinaw sa tibuok probinsya. (James Oliver)
