CAGAYAN DE ORO CITY – Apektado ang moral sa mga pulis sa Police Regional Office 10 kabahin sa pagtawag ni Lt Col Jovie Espenido nga pinakadakong crime group ang Philippine National Police nga naglihok sa nasud.
Kini ang gipalanog nga reaksyon sa PRO-10 pinaagi sa ilang tigpamaba nga si Police Maj Joann Navarro batok sa expose ni Espenido.
Miingon si Navarro nga dakong sukwahi ang pasiatab ni Espenido kay kon tinud-anay nga tinubdan sa kreminalidad ang PNP,walay kahusay’g kalinaw ang Pilipinas ilabina dinhi sa Northern Mindanao.
Siya miingon nga dili patas alang sa mga pulis nga nagtarong sa trabaho ang pasangil ni Espenido kinsa kanhi hepe sa Ozamiz City Police Station sa panahon ni former Pres. Rodrigo Duterte.
Samtang gipasalig usab sa Camp Alagar-based PRO 10 nga andam mopaubos sa imbestigasyon ang mga pulis kon gikinahanglan pag-abot sa isyu sa quota ug reward system nga tipik sa gipabuto nga isyu ni Espenido atubangan sa mga magbabalaod sa kamarabaha.
Miingon si Navarro nga tinud-anay nga dakong kasupakan sa balaod kon tinood nga dunay mando nga patyon ang suspected drug pushers ug bugtian sa salapi ubos sa war on drugs policy kaniadto.
Siya miingon nga daghan nang pulis sa rehiyon nga nangapapha sa katungdanan kay wala magpasagad ang PRO 10 sa ilang mga ilegal nga kalihukan.
Apan gusto usab niya balika ang record sa Internal Affairs Service 10 kon pila ka pulis ang gipaubos sa imbestigasyon kabahin sa maong isyu kaniadto.
Sa pikas bahin,bisan si Citizens Watch for Good Governance 10 convenor Atty. Antonio Soriano nakasulti nga dili makiangayon ang pasangil nga giatubang sa PNP epekto sa expose ni Espenido sa quadrocom sa kamarabaha.
Miingon si Soriano nga mahimong dunay dala nga tinood ang gisulti ni Espenido apan dili kini angayang mayagyag sa publiko apan sa internal nga pagsulbad sa suliran.
Hinoon,nasabtan usab ni Soriano ang gihimo sa maong pulis kay gisungag niya ang mismong PNP epekto sa iyang pagka-dismaya sa pipila ka ilegal nga kalihukan nga tinago atubangan sa publiko.
