Gikompirmar ni kanhi City Mayor Oscar Moreno nga adunay napasaka nga kaso batok sa 4th Infantry Division (Philippine Army) human sila midumili nga tukuran sa tunghaan sa sekundarya ang pribadong luna sulod sa Camp Evangelista Golf Course, Barangay Patag sa syudad. \
Giingon ni Moreno, sa BOMBO RADYO nga dugay na kini nga kaso ug nahitabo na ang pagbayad sa katunga nga kantidad sa tuig 2017, subay sa kontrata tali sa Cagayan de Oro LGU ug sa Pamilya del Puerto, nga mao ang giila nga tag-iya sa yuta.
Hisayran nga bag-o lang midool sa Bombo Radyo ang pamilya del Puerto aron ipahibalo nga hangtod karong 2025, wala pa nila madawat ang nahibilin nga bayad tungod sa pagdumili sa 4th ID nga ipatukod ang tunghaan sulod sa kampo.
Gi-awhag ni Moreno ang pamilya nga makigdayalogo sa kasamtangang administrasyon aron masiguro nga makuha nila ang tibuok bayad ug masugdan na ang proyekto.
Ang tumong sa plano mao ang paghatag sa lig-on nga oportunidad sa edukasyon alang sa kabatan-onan sa syudad, nga unta mahimong mas mapuslanon inay sa golf course nga dili gusto ipatandog sulod sa kampo.
