CAGAYAN DE ORO CITY – Gidangop ni City Mayor Oscar Moreno kang PNP chief Gen Guillermo Eleazar ang pag-atake kaniya ni COCPO deputy director for administration Lt Col Lemuel Gonda.
Kini human tawga ni Gonda si Moreno nga ‘un-cooperative’ sa task recommendation nga ‘granular lockdown’ sa pipila ka brgy nga nasudlan sa COVID-19 delta variant cases sa syudad.
Gipadumdom ni Moreno nga anaa sa mayor ang operational,supervision ug control sa PNP hinungdang dili makiangayon ang gihimo ni Gonda batok kaniya.
Sa gihimo ni Moreno,namiligro nga mapapha sa COCPO ug ma-destino sa laing assignment si Gonda.
Samtang dili makiangayon alang kang Kag Jocelyn Rodriguez nga gamiton nga isyu ni Moreno ang mental issue aron sumbalika’g atake si Gonda.
Kini ang pagpadumdom ni Rodriguez sa mayor tungod sa daw pagbiay-biay ngadto kang Gonda gumikan sa kanunay’g pagpahiyom niini sa matag-meeting sa emergency operation center kontra COVID-19.
Gipadumduman sa konsehal ang iyang mga kauban sa konseho nga kon nadismaya sila kang Gonda,mas labaw ang katawhan sa dismayado kanila tungod sa kahimtang sa dakbayan.
Dugtong niini,uyon ang mayoriya sa konseho nga paphaon sa katungdanan si Gonda.
Kini human ipasar ni Kag Edgar Cabanlas ang resolusyon ug gi-aprobahan sa mayoriya diin nagpadayag sa ilang pagmahay ug kadismaya kang Gonda.
Miingon si Cabanlas nga angayang ilikay na lamang una si Gonda kay dili na sila magkasinabot ni Moreno sa pakigbatok sa COVID-19 ning syudad.
Sa pikas bahin,kakuhaa’g leksyon sa uniformed personnel ang dangatan ni Gonda nga nakapatawag sa atensyon sa Police Regional Office 10 ug bisan sa Camp Crame.
Kini ang pagpadumdom ni retired army maj general ug Kag Romeo Calizo sa tanang mga pulis ug mga sundalo nga dili angay mo-sobra sa paggamit sa kagawasan sa pagpadayag sa ilang mga opinyon.
Si Calizo kinsa uyon nga ipalagpot si Gonda ang namahayag nga makigtagbo kini sa COCPO aron plansahon ang gamay’ng bikil tali Gonda ug mayor sa syudad.
Apan alang sa PRO-10,dili representasyon sa Camp Alagar ug mismo sa COCPO ang pagbulgar ni Gonda nga dili ga-kooperar si CMoreno sa rekomendasyon sa task force batok COVID-19 infections sa syudad.
Pagpanghimakak kini sa PRO-10 human midako ang maong isyu ug nakaabot na sa atensyon sa Camp Crame.
Miingon si PRO-10 spokesperson Lt Col Michelle Olaivar nga nagka-estorya na sila si Gonda ug Regional Director Brig Gen Rolando Anduyan kabahin sa maong kontrobersya.
Nunot usab niini,dili na kinahanglangnon ang pagpatuman sa ‘granular lockdown’ sa usa ka brgy nga nasudlan sa delta variant sa COVID-19 kon kini ubos na sa enhanced community quarantine o ECQ.
Kini ang katin-awan ni DoH- 10 Director Dr Jose Llacuna tungod sa panabangi ni City Mayor Oscar Moreno ug Lt Col Lemuel Gonda.
Miingon si Llacuna nga mahitabo lamang nga granular lockdown kon ang usa ka lugar anaa saa modified ECQ o GCQ apan dili sama sa kahimtang sa Cagayan de Oro.
