Naglaum si Kanhi Cagayan de Oro Mayor Atty. Oscar Moreno nga mahunong o bisan man lang ma-de-escalate ang nagkagrabeng tensyon tali sa United States, Israel ug Iran aron malikayan ang mas dako pang kadaut sa kalibutan.
Sa iyang interbyu sa Bombo Radyo, giingon ni Moreno nga kung dili man dayon mahunong ang kagubot, mas maayo nga mahinay-hinayan kini aron malikayan ang daghang casualties ug mas dako pang eskalasyon sa giyera.
Gipasabot usab niya ang kahinungdanon nga magpadayon ang libre nga paglabay sa mga barko sa Strait of Hormuz tungod kay dinhi moagi ang dakong bahin sa suplay sa krudo sa kalibutan.
Matud pa niya nga kung masirhan ang maong agianan sa barko, daghang nasod ang maapektuhan ilabi na ang mga nagasalig sa importasyon sa langis.
Gipasabot ni Moreno nga daghang nasod sama sa China ang adunay dakong panginahanglan sa enerhiya nga nagagikan sa Middle East, busa dako ang mahimong epekto sa global nga ekonomiya kung magpadayon ang kagubot.
Busa naglaum siya nga makakita og diplomatikong solusyon ang mga nasod nga nalambigit aron malikayan ang dugang pang destabilization sa rehiyon ug sa tibuok kalibutan. (By James Oliver)
