CAGAYAN DE ORO CITY – Gi-akusahan ni City Mayor Oscar Moreno ang kampo ni Gov Bambi Emano nga na-meke sa mga dokumento sa 2020 budget nga giduso sa Department of Budget DBM-Northern Mindanao.
Siya miingon nga gibalik sa DBM ang 2020 budget s human mapakyas ang kapitolyo nga makuha ang tinood nga pirma ni Vice Gov Jeremy Jonahmar Pelaez.
Gibutyag ni Moreno nga gumikan sa gihimo ni Emano, illegal ang paggamit sa pondo sa Bayanihan to Heal as One tungod kay walay pirma ni Pelaez ang supplemental budget.
Samtang gihagit ni Emano si Moreno nga sulbaron una niini ang walay hunong nga pagsaka sa kaso sa coronavirus disease sa dakbayan.
Kini human komentohi ni Moreno ang na-TRO sa korte ang budget sa lalawigan tungod sa gipamugos sa SP opposition nga kahiwian sa pagbantay niini sa tuig 2019.
Miingon si Emano nga dili angay tumpangan ang pag-eksena sa mayor kay mas daghang suliran sa dakbayan nga angay niini hataga’g kasulbaran.
